خناقة كبيرة دايرة بين فريقين كل منهم يدعي حرصه علي مصلحة الشعب و ده مش باين في الخناقة .... كانت تبقي خناقة حلوة جدا ومثمرة لو كلامهم صحيح و لكن للأسف فهي شبيهة بخناقة الأهلي والزمالك ... فرقتين بيتخانقوا لمصالحهم الشخصية و عمرهم ما فكروا ولا هيفكروا في مصلحة المنتخب و ده حقهم لانهم بيمثلوا جمهورهم
لكن لما تتكلم باسم الشعب و انت بتلعب لمصالحك يبقي ده مش من حقك
للأسف الفريقين السياسين كل واحد فيهم عايز يكتب دستور يعبر عن مصالحه تحت راية انه خايف علي مصلحة الشعب اللي يعيني مش عارف مصلحته
السؤال بقي انتم جمهوركم يطلع كام واحد كده ان شاء الله ؟ .... مليون اتنين تلاتة ولا حتي اربعة ..... طيب و ال80 مليون دول بقي نمثلهم ازاي و نعمل فيهم ايه و لا هما علشان ملهمش فريق ميلعبوش
لأ طبعا ال80 مليون ليهم فريق و فريق قوي جدا كمان بس للأسف مش معاه الامكانيات اللي تساعده انه ينافس ويتكلم
كلامي بقي لل80 مليون دول اللي هما عمال و فلاحين و دكاترة ومهندسين و سواقين و رياضين وطلبة ودكاترة جامعة ومدرسين و كل اطياف الشعب ..... انت عارف ان الدستور ده بيعبر عنك انت و انه معمول علشانك و علشان يخدم مصالحك .... طيب ليه ساكت ليه سايب فرقتين ملهمش لازمة من غيرك يتخانقوا علي مين يعملك دستور ... طيب ما تعمله انت ..... ازايييييييييييييييي
الدستور تشكله لجنة تأسيسية تعبر عن الشعب و تصيغ طموحاته واهدافه في هيئة قوانين متفق عليها ..... اللجنة دي في ناس بتتخانق عليها دلوقتي وعايزين يدخلو بالعافية بس احنا ممكن منديهمش فرصة لو عملنا الاتي
1-انتخابات جديدة في كل نقابات مصر من عمالية لمهندسين لفلاحين لصيادلة لأطباء لفنانين لسواقين لكله حتي العواطلية يعملوا نقابة و يختارو اللي يمثلهم
انتخابات في كل جامعات مصر تشمل الرؤساء و العمداء
بكده بقي عندنا 70% تقريبا من اللجنة التأسيسية اللي هتشكل الدستور بتاعنا و اللي لو جه اي حد سواء بقي كان فريق انتخابات أو الدستور أولا يختار و يشكل لجنة تأسيسية هنبقي بشكل أو باخر ضغطنا و فرضنا عليه اللي احنا عايزينه
2- فتح نقاش مجتمعي علي مواد الدستور علي الانترنت و في الشارع و الفكرة ديه اتنفذت في جنوب أفريقيا و بتتنفذ دلوقتي في المغرب و ان شاء الله قريب هتبتدي في مصر .... أهمية النقاش ده اللي ما بين الشعب فعلا - مش بقي لجنة حمار وطني ولا وفاق و الهبل ده - انه هيحدد ملامح للدستور و هيوفر وقت كبير علي اللجنة اللي هتشكل الدستور
3- لازم كل الاطراف يكون عندها ثقة في بعض ... بدون الثقة كلنا هنخون بعض و مش هنوصل لأي حاجة و هنتأخر كام سنة زي ما حصل في الثورة الفرنسية
اتناقشت في موضوع النقابات ده مع @m_mamdouh
اتفقنا علي اهمية انتخابات النقابات الاول لانها هتعبر عن نسبة لا بأس بها من الشعب و لكن كان في تصميم منه علي تعديل اللوائح الداخلية المنظمة للنقابات لانها هتساعد علي تقوية دور النقابات في المجتمع و هتجعل تمثيلها امام الحكومة تمثيل قوي و هتخلي ليهم صوت مسموع عند الوزارات المختلفة بحيث ان الطلبات تبقي مرهونة بفترة للتنفيذ
... لكن المشكلة في الوقت اللي فاضل قبل تشكيل اللجنة التأسيسية مش هيكفي لكل الاصلاحات و التعديلات المطلوبة .... لكن السؤال اللي مش عارف اجابته .. هل في وقت لاجراء الانتخابات في النقابات و الاتحادات المختلفة ؟
ياريت بقي نسيبنا من الخناقة دي و نفكر نعمل حاجة مفيدة و عليها توافق من الناس و تبقي في مصلحة البلد
اتفقنا علي اهمية انتخابات النقابات الاول لانها هتعبر عن نسبة لا بأس بها من الشعب و لكن كان في تصميم منه علي تعديل اللوائح الداخلية المنظمة للنقابات لانها هتساعد علي تقوية دور النقابات في المجتمع و هتجعل تمثيلها امام الحكومة تمثيل قوي و هتخلي ليهم صوت مسموع عند الوزارات المختلفة بحيث ان الطلبات تبقي مرهونة بفترة للتنفيذ
... لكن المشكلة في الوقت اللي فاضل قبل تشكيل اللجنة التأسيسية مش هيكفي لكل الاصلاحات و التعديلات المطلوبة .... لكن السؤال اللي مش عارف اجابته .. هل في وقت لاجراء الانتخابات في النقابات و الاتحادات المختلفة ؟
ياريت بقي نسيبنا من الخناقة دي و نفكر نعمل حاجة مفيدة و عليها توافق من الناس و تبقي في مصلحة البلد
