ملاحظات علي الاعتصام

بسم الله الرحمن الرحيم 

  انا مش معتصم في الميدان لظروف اسرية بحتة لكن انا الحمد لله كل يوم بصعد للتحرير _هو يوم واحد اللي مقدرتش انزل لظروف 

فنجرية _ والدي خاف عليا اليوم ده ورفض نزولي لكن لما عرف ان الفنجري طلع بق بقي يسيبني انزل عادي 

ثانيا  انا من المحلة و قاعد اليومين دول في القاهرة مخصوص علشان التحرير ويمكن لاقتناعي الشديد باهمية الاعتصام انا هكتب 

ملاحظاتي و يا ريت مفيش حد يفسرها غلط

أولا : اللجان الشعبية

من خلال تجربتي مع اللجان الشعبية اللي بتحاول علي قد ما تقدر تأمن الميدان .. أحب أقول ان الوقفة في اللجان دي متعبة جدا وان يا ريت الاخوة المعتصمين اللي لم يشتركوا في تأمين الميدان قبل كده  يا ريت يريحوا أخواتهم شوية و ياريت يعرفوا ان الاعتصام مش بيات في الخيم و هتافات ومناقشات بس

الرجالة المتوافدة علي التحرير نوعين .. ناس جاية من أجل تحقيق مطالب الثورة و دول مفيش منهم مشكلة و الاخرين جايين يقضوا

 مصالحهم و دول نوعين ... يا اما متفهمين لطبيعة الاعتصام وضرورة تأمينه و مفيش مشاكل عندهم من اللجان و الاخرين  ضد مبدأ الاعتصام و بيعملوا مشاكل كتير فياريت الناس اللي بتفتش تطول بالها عليهم و متحاولش تعمل مشاكل معاهم

نسبة كبيرة من الناس اللي في اللجان من اخواتنا اللي علي قد  حالهم فياريت اللي داخل الميدان و شايف نفسه ابن ناس ميحاولش يحسسهم ان في فرق بينهم .. انا شفت الوضع ده وضايقني جدا

اكتر ناس بتعمل مشاكل هما الستات الكبيرة في السن شوية ... بالراحة عليهم شوية دول برضوا زي امهاتنا

اكتر حاجة مستفزة لما تلاقي واحد داخل و مش راضي يتفتش ويقولك انا من امن الميدان وانت ازاي مش عارفني .... حضرتك اكتر واحد المفروض تلتزم بالقوانين اللي بتنفزها و الا منلومش علي الظباط اللي بيتهربوا من كل حاجة بينفذوها في عملهم 

ثانيا : الباعة الجائلين

وجودهم ضروري لكن محتاج تنظيم و انا مش عارف التنظيم يبقي ازاي بصراحة فياريت اللي عنده فكره يفيدنا بيعا 

يوم الجمعة 15\7 كان عدد الباعة مبالغ فيه بشكل كبير جدا و انا حسيت ان الميدان كان ناقصه بحر ويقلب مصيف و حسيت ان الجو العام ده بيضعف من قوة الاعتصام حتي لو العدد كبير ...... يا ريت لو انا غلطان حد يصححلي

ثالثا : المنصات

مش معقول يا جماعة اني افضل في الميدان بي ال 7 او 8 ساعات مش سامع غير صوت عالي من غير م افهم حاجة ..... لازم يبقي فيه مناقشات  او حتي مناظرات - تويت ندوة مثلا - حول كيفية تحقيق المطالب و طرق الضغط المختلفة وكده يعني .. انما ان واحد يطلع يزعق بعبارات ثورية بس معتقدش انها هتفيد بحاجة

في اقتراح ان المنصات تبطل من الساعة 1 بالليل علشان الناس تعرف تنام ... مش عارف ازاي حاجة زي كده مش بتحصل و متنسوش ان في ناس ساكنة في العمارات اللي حوالينا

رابعا : طرق الضغط

انا شايف ان لازم عدد المسيرات يكتر و تبقي في وسط البلد لغاية الداخلية ودار القضاء وغيره و في الاوقات اللي الشوارع فيها مليانة

من وجهة نظري ان قفل المجمع من جهة المعتصمين غلط و تأثيره مكش حلو بالنسبة لينا ... لكن ايه رأيكوا مثلا بتشكيل وفد من المعتصمين تكون مهمته اقناع موظفي المجمع بمطالب الاعتصام و مشاركتنا بالامتناع عن العمل لحين تحقيق مطلب معين مثلا ... دي مجرد فكرة ممكن تنجح وممكن تفشل

ممكن نفس الفكرة نطبقها مع عمال المصانع التابعة لشركات حكومية زي الحديد والصلب و الغزل والنسيج

لازم نفهم الناس بمطالب الاعتصام وايه اهمية تحقيق المطالب دي في الوقت ده وايه اهمية دعم المواطن العادي للاعتصام حتي لو بكلامه مع الناس اللي يعرفهم واقناعهم لان ده بيزيد من قوة الاعتصام و ممكن نحقق ده بتوزيع منشورات في المترو مثلا او في اماكن التجمعات الكبيرة وده علشان نقد نوصل للناس بعد ما كل بتوع السياسة باعونا واهتموا بمصالحهم الشخصية فقط   

مش فاكر قلت كل اللي عايز اقوله ولا لأ بس لو اي حد عنده ملاحظات سواء علي كلامي او علي الاعتصام ياريت يكتبها هنا او يناقشني علي تويتر @momo2010_2007